Zec 1 | NdeIBE | STEP | Ngenyanga yesificamibili yomnyaka wesibili kaDariyu, ilizwi likaJehova lafika kumphrofethi uZekhariya indodana kaBherekhiya, indodana ka-Ido lisithi:

Zechariah 1

Ubizo Lokubuyela KuJehova

1 Ngenyanga yesificamibili yomnyaka wesibili kaDariyu, ilizwi likaJehova lafika kumphrofethi uZekhariya indodana kaBherekhiya, indodana ka-Ido lisithi:

2 “UJehova wayezondile kakhulu ngabokhokho benu. 3 Ngakho tshela abantu uthi: Nanku akutshoyo uJehova uSomandla: ‘Buyelani kimi,’ kutsho uJehova uSomandla, ‘lami ngizabuya kini,’ utsho njalo uJehova uSomandla. 4 Lingabi njengabokhokho benu, okwatsho kubo abaphrofethi bamandulo, bathi: Nanku okutshiwo nguJehova uSomandla, uthi: ‘Phendukani ezindleleni zenu zobubi lezenzo zenu ezimbi.’ Kodwa kabafunanga ukulalela loba ukukunanza okwakutshiwo, kutsho uJehova. 5 Bangaphi manje okhokho benu na? Bona abaphrofethi kambe baphila okungapheliyo na? 6 Kodwa amazwi ami lemithetho yami engangilaye ngakho izinceku zami abaphrofethi kakuzange kuze kubafice yini okhokho benu? “Kwayikhona bephenduka besithi, ‘UJehova uSomandla wenzile kithi okufanele izindlela zethu lezenzo njengalokho amisa ukukwenza.’ ”

Indoda Iphakathi Kwezihlahla Zommethile

7 Ngelanga lamatshumi amabili lane ngenyanga yetshumi lanye, inyanga uShebhathi, ngomnyaka wesibili kaDariyu, ilizwi likaJehova lafika kumphrofethi uZekhariya indodana kaBherekhiya, indodana ka-Ido.

8 Ebusuku ngafikelwa ngumbono – khonapho phambi kwami kwakulendoda igade ibhiza elibomvu! Yayimi phakathi kwezihlahla zommethile edongeni. Ngemuva kwayo kwakulamanye amabhiza, elibomvu, eliyinsundu lelimhlophe.

9 Ngayibuza ngathi, “Kuyini lokhu, nkosi yami na?” Ingilosi eyayikhuluma lami yaphendula yathi, “Ngizakutshengisa ukuthi kuyini.”

10 Kwasekusithi leyondoda eyayimi ezihlahleni zommethile yachaza yathi, “Laba yibo uJehova abathumileyo ukuba bahambe emhlabeni wonke.”

11 Base bebika engilosini yenkosi eyayimi phakathi kwezihlahla zommethile bathi, “Sesiwuhambile wonke umhlaba safumana ukuthi ilizwe lihlezi kuhle phakathi kokuthula.”

12 Ingilosi kaJehova yasisithi, “Jehova Somandla, koze kube nini ulokhu ugodla isihawu sakho phezu kweJerusalema lamadolobho akwaJuda olokhu uwathukuthelele yonke iminyaka le engamatshumi ayisikhombisa?”

13 Ngakho uJehova wasekhuluma amazwi omusa, aduduzayo kuleyongilosi eyayikhuluma lami.

14 Kwasekusithi ingilosi eyayikhuluma lami yathi, “Memezela leli ilizwi: Nanku akutshoyo uJehova uSomandla, uthi: ‘Ngilobukhwele ngeJerusalema leZiyoni, 15 kodwa ngizondile ngalezozizwe ezihlezi zanaba. Ngangithukuthele kancane kodwa zawengezelela lowo monakalo.’

16 “Ngakho-ke nanku okutshiwo nguJehova: ‘Ngizabuya eJerusalema ngilomusa, khonapho indlu yami izakwakhiwa kutsha. Intambo yesilinganiso izakwelulwa eJerusalema,’ kutsho uJehova uSomandla.

17 “Memezela njalo uthi: Nanku akutshoyo uJehova uSomandla, uthi: ‘Amadolobho ami azaphinda njalo aphuphume ngenotho, njalo uJehova uzaphinda ayiduduze iZiyoni, ayikhethe iJerusalema.’ ”

Izimpondo Ezine Labakhandi Abane

18 Ngase ngiphakamisa amehlo – khona phambi kwami kwakulezimpondo ezine!

19 Ngabuza ingilosi leyo eyayikhuluma lami, ngathi, “Kuyini lokhu?” Yaphendula yathi, “Lezi yizo izimpondo ezachitha uJuda, lo-Israyeli leJerusalema.”

20 UJehova wasengitshengisa abakhandi abane. 21 Ngabuza ngathi, “Laba bazekwenzani na?” Waphendula wathi, “Lezi yizimpondo ezachitha uJuda ukuze angabi khona ovusa ikhanda, kodwa abakhandi balande ukuzazethusa bazilahlele phansi izimpondo lezi ezezizwe ezaphakamisa izimpondo zazo phezu kwelizwe lakwaJuda ukuchitha abantu balo.”